ཛ་དྲག་གི་གསལ་བསྒྲགས།

      October 3, 2017:14 AM

སྤྱི་ལོ༢༠༡༧ཟླ་༩ཚེས༢༧ཉིན་དང་ཟླ་༡༠ཚེས་༡ཉིན་ནི་སྤྱི་ལོ་༡༩༨༧ཟླ་༩ཚེས་༢༧དང་ཟླ་༡༠ཚེས་༡ཉིན་བོད་ཀྱི་མི་རབས་གསར་པས་བོད་ཀྱི་རྒྱལ་ས་ལྷ་སར་བོད་རང་བཙན་གྱི་ཞི་རྒོལ་འཐབ་རྩོད་ཀྱི་ལས་འགུལ་སྤེལ་ནས་མི་ལོ་ཧྲིལ་པོ་སུམ་ཅུ་འཁོར་བའི་ལོ་རྒྱུས་རང་བཞིན་གྱི་གལ་ཆེའི་དུས་དྲན་ཞིག་ཡིན་པ་དང།དུས་དྲན་དེ་གཉིས་ལ་སྲུང་རྩི་བྱ་རྒྱུའི་ཐད་འདི་ག་ཚོགས་པར་གཞན་ལ་དཀྲིས་ཐབས་བྲལ་བའི་དམིགས་བསལ་གྱི་འགན་འཁྲི་དང་འོས་འགན་ཡོད་པར་བརྟེན།ཟླ་༡༠ཚེས་༡ཉིན་བཞུགས་སྒར་དཔའ་བོའི་དྲན་གསོའི་རྡོ་རིང་གི་མདུན་ཐང་དུ་སྐབས་དེའི་ལས་འགུལ་དེ་གཉིས་དང་འབྲེལ་བའི་པར་རིས་འགྲེམས་སྟོན་གྱི་ལས་འགུལ་ཞིག་སྤེལ་ཡོད། ཡིན་ནའང་སྐབས་དེ་འདྲ་ཞིག་ལ་རྒྱ་མོ་ཞིག་གིས་ཐག་པའི་སྟེང་བསྒར་ཡོད་པའི་པར་རིས་མར་འཐེན་ནས་མི་འདོད་པའི་རྣམ་འགྱུར་བསྟན་པ་དང།  སྐབས་དེར་འདི་ག་ཚོགས་པའི་ཚོགས་གཙོ་མཆོག་ནས་གོ་སྐོན་སློབ་གསོ་རྒྱབ་ཀྱང་དེ་ལས་ལྡོག་ཏེ་རྩུབ་སྤྱོད་ཀྱི་རྣམ་འགྱུར་དེ་བས་ཤུགས་ཆེན་བསྟན་པ་མ་ཟད། གསར་འགོད་པའི་ངོ་གདོང་ལ་ཞུས་པ་དང་པར་ཆས་ས་ལ་གཡུགས་པ། ཚོགས་པའི་དྲུང་ཆེའི་ལག་པར་སོ་བརྒྱབ་པ། ཁུག་མའི་ནང་ནས་ཇེམ་རྩེ་བཏོན་ནས་པར་རིས་བསྒར་བའི་ཐག་པ་བཅད་ནས་པར་རིས་ཚང་མ་ས་ལྷུངས་པ་སོགས་ཀྱི་གནས་ཚུལ་ཐོན་ཡོད།

རྒྱ་ནག་གུང་ཁྲན་ཏང་གིས་བོད་དུ་བཙན་འཛུལ་དང་བོད་མི་རིགས་རྩ་མེད་བཟོ་ཆེད་འཆར་གཞི་ལྡན་པའི་ཐོག་ནས་སྲིད་ཇུས་རབ་དང་རིམ་པ་ཞིག་ལག་ལེན་བྱེད་བཞིན་ཡོད་པ་དེར་བོད་མི་ཚོས་ཐ་ན་རང་ལུས་མེར་བསྲེགས་ཀྱི་ཐོག་ནས་རྒྱ་གཞུང་གི་དབང་བསྒྱུར་ལ་ངོ་རྒོལ་བྱེད་བཞིན་པའི་ཛ་དྲག་ཆེ་བའི་དུས་ཚོད་འདི་འདྲའི་སྐབས། རྒྱ་མོ་ཞིག་གིས་བཙན་བྱོལ་བོད་མིའི་ལྟེ་གནས་རྡ་རམ་ས་ལར་ཡོང་ནས་བོད་དོན་འཐབ་རྩོད་དང་འབྲེལ་བ་ཡོད་པའི་ལས་འགུལ་གྱི་ཐོག་རང་སྣང་གང་དྲན་གྱི་སྒོ་ནས་གཏོར་བཤིགས་དང་རྩུབ་སྤྱོད་ཀྱི་རྣམ་འགྱུར་འདི་ལྟ་བུ་བསྟན་པ་ནི་བོད་མི་ཞིག་གི་ངོས་ནས་བཤད་ན་སེམས་ཀྱིས་བཟོད་ཐབས་མེད་པའི་གནས་ཚུལ་ཞིག་རེད། ཡིན་ནའང། འབྲེལ་ཡོད་ལས་དོན་མི་སྣས་གནས་ཚུལ་ཚབས་ཆེར་མི་འགྲོ་བའི་ཆེད་ཁོ་མོའི་རྩུབ་སྤྱོད་ཀྱི་བྱེད་སྟངས་བཀག་འགོག་བྱ་རྒྱུ་ཙམ་ལས་ཁོ་མོའི་ལུས་ཐོག་ལ་སྐྱོན་ཆ་གང་ཡང་བཏང་མེད་ལ། དེ་རྗེས་བདེ་སྲུང་ལས་ཁུངས་དང་རྒྱ་གར་གྱི་འབྲེལ་ཡོད་ཉེན་རྟོག་དང་གསང་བའི་ལས་ཁུངས་སོགས་ལ་ཡིག་ངག་གཉིས་ཀྱི་ཐོག་ནས་དུས་ཐོག་ཏུ་སྙན་གསེང་ཞུས་ཡོད།

 

འཚམས་འདི་ནས་བོད་མི་སེར་སྐྱ་ཕོ་མོ་ཡོངས་ལ་ཛ་དྲག་གི་འབོད་སྐུལ་ཞུ་རྒྱུར།  ༸གོང་ས་སྐྱབས་མགོན་ཆེན་པོ་མཆོག་གི་སྐུ་ཕྱར་སྲུང་སྐྱོབ་བྱ་རྒྱུ་དེ་བོད་དོན་འཐབ་རྩོད་ཀྱི་རྒྱལ་ཕམ་དང་།  བོད་མིའི་ཕྲལ་ཡུན་གྱི་བདེ་སྐྱིད་ལ་ཐུགས་པའི་དོན་ཆེན་ནང་གི་དོན་ཆེན་དང་རྩ་བའི་ནང་གི་རྩ་བ་ཡིན་པར་བརྟེན།   ཚང་མས་དུས་རྟག་ཏུ་དོ་སྣང་ཆེར་བསྐྱེད་དགོས་པ་མ་ཟད། འདི་འདྲ་བའི་གནས་ཚུལ་ཆེ་ཆུང་གང་ཞིག་མཐོང་ཐོས་བྱུང་ཡང་ངེས་པར་དུ་འབྲེལ་ཡོད་ཚན་པར་དུས་ཐོག་ཏུ་སྙན་གསེང་ཞུ་དགོས་པ་མ་ཟད།ལྷག་པར་དུ་མགོན་པོ་གང་གི་སྐུ་ཕྱ་དང་ཐད་ཀའི་འབྲེལ་བ་ཡོད་པའི་དགའ་ལྡན་ཕོ་བྲང་དང་བདེ་སྲུང་ལས་ཁུངས་སོགས་ཀྱི་ངོས་ནས་སྔར་བས་འབད་བརྩོན་དང་ཡིད་གཟབ་གནང་གལ་དགོས་གལ་གྱི་འབོད་སྐུལ་དང་བཅས།

 

 

Leave a Reply

Your email address will not be published. Required fields are marked *